ركز معايا الخطوات سهلة, هات ورقة وقلم واكتب ورايا:
الخطوة الأولى: الهيئة الخارجية, الدنيا مظاهر زي ما إنت عارف, هاتلك كوفية فلسطيني وماتحلقش شعرك ولا دقنك عشان تاخد اللووك الشيوعي الجميل بتاع المناضلين دا (أفتكر جيفارا كان عنده كوفية من دول؟ عموما لو معندوش كان لازم يجيب).
الخطوة التانية: اعمل فورا أكاونت على تويتر ويوتيوب ومدونة على بلوجر.
الخطوة الثالتة: كل شوية شارك فيديوهات ومقالات مش فاهم منها حاجة بس تحسّها سياسية كده على فيسبوك وتويتر.
الخطوة الرابعة: امشي ورا أي حد تحس انه مناضل كده في نفسه وثورجي, شعارك يكون دايما الثورة غاية وليست وسيلة. مش مهم يكون ليك عقل لوحدك ولا اتجاه سياسي, شوف بس الناس قافشة على مين على تويتر واقفش عليه ولازم توضح قد ايه دمك محروق من الموضوع دا أو قد ايه الإنسان دا اللى هم قافشين عليه فلول وعميل.
الخطوة الخامسة: ابتدي اكتب اي هبل على البلوج بتاعك (راجع الخطوة التانية), وصور نفسك بتقول اي كلام باللابتوب اللى مامتك جابتهولك عشان انت قلتلها محتاجه في الجامعة وحط الفيديو على يوتيوب وقول للناس دي اخر اصدارات الفيديو بلوج بتاعي Vlog كأنك طول عمرك بتعمل كده.
الخطوة السادسة: ابتدي صدق نفسك عشان المظهر الخارجي والنيولووك اللى انت عامله مش هيعيش كتير, احفظلك كام مصطلح كده على كام خبر وخلي دي طريقة كلامك الجديدة.
الخطوة السابعة: تويتر معقل النشطاء, ادخل اكتب في البيولاين بتاعك انك فخور انك مصري كأنك لسة واخد الجنسية بعد الثورة واكتب بفخر إن اللى عايز يعملك فولو لازم يبقى عنده 18 سنة أو اكتر عشان انت سافل ولسانك طويل, خصوصا لو انت لسة تامم ال18 سنة دول قريب .. من سنة ل5 سنين كده يعني.
الخطوة الثامنة: ادخل على تويتر واشتم اشتم اشتم اشتم كأن مفيش بكره, اشتم اشتم اشتم اشتم كأنك بتقف في المظاهرات من السبعينات وتشتم, اشتم في طوب الأرض اللى معاك واللى عليك واللي فاهمه واللى مش فاهمه, اشتم عشان يحترموك ويخافوا منك ويقولوا عليك ثورجي قديم ورد معقتلات, اشتم اشتم اشتم اشتم اشتم اشتم اشتم بس!
ملحوظة: الشتايم لازم تقول قبيحة وسافلة وبالأم والأب والدين والدنيا وكل حاجة.
اضغط على الصورة للتكبير
 |
| @TaherArt يوميات مناضل تويترجي - بريشة |
