Sabrology On FB Follow Me

عشان مايضحكش عليك ويقولك امك هتقلع الحجاب

Friday, May 6, 2011

عشان ماحدش يخوفك من الليبرالية والديموقراطية وتبقى عامل زي الراجل ده: 

قبل ما تتكلم وتقول : "مش هي دي الديموقراطية؟ ما انا اعمل بقى اللى انا عايزه" ، لازم تفهم يعني ايه ديموقراطية اصلا
ناخذ مثلا الشيخ محمد حسين يعقوب لما قال غزوة الصناديق، اسمع كده بيقول ايه:

كده انت فهمتنا غلط وبتضحك على الناس يا معلم .. مش هي دي الديموقراطية ،، لغويا هي تعني حكم الشعب لنفسه، و لا تعني بأي حال من الأحوال حكم الأغلبية!!
واللى يستعمل الفلوس او السلطة أو البلطجة أو الدين في السياسة كلهم زي بعض، السياسة تخطئ وتصيب، فهل يصح اقحام الدين مثلا في شيء يحتمل الخطأ والصواب؟

من أخطر مساوئ الديموقراطية أنها قد تؤدي الى حاجة بتوع السياسة بيسموها "طغيان الأغلبية" 
يعني فيه بلاد اصدرت قرارات بتمنع رموز دينية معينة زي مثلا النقاب والحجاب الإسلامي ، والمانيا النازية كانت ديموقراطية و الديكتاتور الأشهر ادولف هتلر نفسه جاء بانتخابات نزيهة باكتساح الحزب النازي سنة ١٩٣٣

ومش أي حاجة الأغلبية موافقة عليها تبقى صح، الديموقراطية الليبرالية الصح يعني مراعاة الأقليات وحرية الجميع .. وكلنا فاكرين رأي الأغلبية في امريكا قبل مارتن لوثر كينج كان ايه؟  ايه رأيكم لو كان حصل تصويت على موضوع الزنوج والعبودية؟ مش كان هيفضل فيه عبيد في امريكا لغاية دلوقتي؟ 
يبقى لازم نفهم ان الديموقراطية لاتعين طغيان الأغلبية .. ولا يجب اقحام أي نوع من الضغط النفسي أو المادي أو الديني للتأثير على الإتجاهات السياسية للشعب ، يعني اللى بيدفع رشوة عشان ياخد صوت، زيه زي اللي كاتب يافطة عليها صوت لأخوك المسلم عشان الدين قالك نعم زي الأخ يعقوب اللى في الفيديو. و زيهم زي اللى بيستعمل البلطجية في الإنتخابات. 

الديموقراطية الليبرالية بقى بتكفلك الآتي: 
 - الحق في الحياة والسلامة الشخصية.
 - التحرر من العبودية.
 - حرية التنقل.
 - المساواة أمام القانون وأن تأخذ العدالة مجراها في ظل سيادة القانون.
 - حرية الكلام وحرية الصحافة والحصول على المعلومات من مصادر متنوعة. 
 - حرية الإنتساب للجمعيات والتجمعات.
 - وجود قضاء مستقل.
 - الحق في التملك والبيع والشراء.

يعني الليبرالية زي ما بتكفل لغيرك حق انها تلبس بيكيني ، بتكفلك كمان حق انك تلبسي نقابك والكل متساوي في الحقوق وعليه نفس الواجبات. 



 
Blogger Widgets